Hasi da 31. Hiru Txirlo Txapelketa

Erabiltzailearen aurpegia

Covidak eragindako geldialdiaren ostean, abian dira berriz bola txapelketak inguruotan. Joan zen zapatuan, jokatu zen lehen jardunaldia Elorrion eta bertan San Andres taldeko Jose Gabriel Nuñez plazentziatarra izan zen garaile, 8 txirlo botata. Hain zuzen, hurrengo hitzordua Soraluzen izango dute, datorren zapatuan, San Andresko bolatokian.

Urriaren 16an, zapatuan, abiatu zuten Euskal Herriko 31. Hiru Txirlo Bola Joko Txapelketa  Elorrioko Argiñeta auzoan. Pandemia osteko lehen jardunaldi ofiziala izan zen eta parte hartze handia izan zuen, guztira, 73 bolarik hartu baitzuten.

Lehen jardunaldiko sailkapen nagusia honela gelditu zen: 

1. Jose gabriel Nuñez (San Andres): 8 txirlo

2. Bittor Rodriguez  (Asolaberri): 6 txirlo

3. Jon Aransolo  (MX3T): 6 txirlo

4. Jose Angel Fernandez  (MX3T): 6 txirlo

5. Oier Azurmendi (MX3T): 6 txirlo

6. Sergio Rodriguez (Asolaberri): 5 txirlo

7. Jose Antonio Nuñez (San Andres): 3 txirlo

8. Iñaki Ariznabarreta: 2 txirlo

9. Iñaki Burunza: 1 txirlo

Hurrengoa San Andresen

Guztira, lau bolatokitan jokatuko dituzte aurtengo txapelketako lau jardunaldiak. Bigarrena, urriaren 23an, datorren zapatuan, jokatuko dute San Andres auzoko bolatokian; hirugarrena, Markina-Xemeingo Lauzirikan egingo dute, azaroaren 6an; eta, laugarren eta azken jardunaldia, aurtengo sailkapen orokorra erabakiko duena, Azpeitiko Garmendipen jokatuko dute, azaroaren 13an.

Handik astebetera, azaroaren 20an, jokatuko dute Lehendakari Txapelketa, Iruzubietako bolatokian, Ziortza-Bolibarren.

Zabalik edonorendako

Ohikoa den moduan, txapelketako jardunaldietan edozeinek parte hartu ahal izango du. Esaterako, izena kanporaketa jokatuko den egunean eta lekuan bertan eman ahalko da, berau hasi baino lehenxeago eta, ordutegiari dagokionez, Argiñetan bezala, saio guztiak arratsaldeko 17:00etan hasiko dira.  

Saririk ere ez da faltako. Jardunaldi guztietan banatuko dira sariak. Lehenengo sailkatuak 65 euroko saria jasoko du, bigarrenak 50 eurokoa, hirugarrenak 35 eurokoa, laugarrenak 20 eurokoa, bosgarrenak 10 eurokoa, eta seigarren sailkatuak, berriz, oparia.