Bestalde, aprobetxatuz zuhaitzak landatzeko sasoirik egokienean gaudela, otsailean beste landaketa bat egiteko asmoa dugu eta martxoan urtero familiekin batera egin ohi den Zuhaitz Eguna antolatzekoa. Hitzorduok zehaztu ahala jakinaraziko ditugu eta bereziki eskertuko dugu herritarrek parte hartzea, azkenengo landaketa honetan esaterako, boluntarioei dagokienez justu samar ibili gara eta.
Atzo, hamar lagunek hirurehun zuhaitz-landare sartu genituen Erresidentziak Erlaegi baserriaren gaineko mendi magalean duen lursailean. Askotariko zuhaitzak: haritzak, lizarrak, elorriak, ezkiak, lertxunak, urritzak, astigarrak, urkiak eta zumarrak. Izan ere. lursail horretan bota berri dute pinadia eta etorkizunean bertako basoa eratu nahi dute.