Haurren aurrean helduok heldu ekimena guraso eta hezitzaileei zuzendutako dinamika da, umeekin kontaktuan dauden helduen hizkuntz portaeretan eragin eta umeen aurrean eredu izatea bilatzen duena. Gaur arratsaldeko 17:30ean emango dute ekimenaren berri Tolarekua aretoan eta bertaratzen direnen artean, urriaren 19tik 29ra bitartean ekimena Soraluzen garatzeko moduak adostuko dituzte.
Aurkezpena Pil-pilean Euskaltzaleen Elkarteak eta Soraluzeko Udaleko Hizkuntza Politikarako Sailak antolatu dute eta parte hartzera gonbidatu dituzte egunerokoan umeekin harremanetan dauden guraso, zaintzaile eta hezitzaileak.