Akelarre musika taldea 1972an sortu zuten, Soraluzen, ordura arte Los Mansos taldean ibilitako hainbat musikari eta Iñaki Arriaran abeslaria batu zirenean. Ramon Aranzasti (baxua) eta Juan Luis Ibarzabal (teklatua), Jose Cambronero (gitarra), Iñaki Arriaran (ahotsa), Jose Antonio Ruiz (biolina) eta Ramon Pia (bateria) izan ziren Akelarreko hasierako taldekideak.
70 eta 80ko hamarkadetan, Akelarre Euskal Herriko plaza talderik arrakastatsuenetakoa izan zen, Egan-ekin batera. Guztira, 15 disko grabatu zituen. Azkena 2005ean, 1972-2005 Zuzenean izenekoa, Oialume dantzatokian grabatu zuten zuzeneko azken kontzertuari dagokiona.
Taldeak bere ibilbidea amaitu eta hogei urtera Bideografik ekoiztetxeak 85 minutuko ikusentzunezkoa grabatu du talde mitikoaren historia kontatzeko. Bertan, ibilbidean zehar taldekide izan ziren hainbat pertsonaren kontakizunak eta garai bateko grabazioetako irudiak jasotzen dira.
Gaur arratsaldean, aukera bikaina izango da Soraluzen sortu zen talde mitikoaren ibilbidea gogoratu edo ezagutzeko. 20:00etan Antzokian.