Zapatuan, azaroaren 22an, musikarien eguna da, Santa Zezilia, eta, haren bueltan, atzo, musika emanaldia eskaini zuten Soraluzeko Musika Eskolako ikasleek. Eguraldi bustiaren ondorioz, kalejira egin barik, Plaza Zaharreko karpan elkartu ziren, gurasoak eta lagunak zain zituztela. Karpa beteta zela, bost pieza interpretatu eta abestu zituzten ikusleen laguntzarekin. Txoripanarekin borobildu zuten ekitaldia.
Atzo, Soraluzeko Musika Eskolako Musika eta Mugimendua eta Musika Kantuz ikasgaietako ikasleek, banda gazteak, trikitilariek eta pandero-jotzaileek gogotik interpretatu zituzten azken asteotan Santa Zezilia egunerako prestatzen ibili diren kantuak.
Klasikoekin batera -Azaroak 22, Musikalean, Ikusi Mendizaleak…- aurten, berritasun modura Josu Elberdinen Pentagrama batek haizean kantua ere interpretatu zuten, koreografia eta guzti. Eta borobiltzeko, noski, txoripan gozoa partitu zieten musikari gazteei.