Atzo arratsaldean, udal ordezkariak -Unai Larreategi alkatea tarteko-, dultzaineroen eta txistulari taldeko ordezkariak, Arrasateko Erraldoi eta Kilikien konpartsako ordezkaria eta herriko hainbat eragile eta norbanako elkartu ziren KLB8ko lokalean, herriko erraldoiak sortzeko Udalak deitutako bilera irekian.
Udal ordezkariek jakinarazi zutenez, erraldoiak egiten dituzten hainbatekin aukerak aztertu ondoren, Oñatiko Xabi Mendizabalekin ari dira harremanetan, 2026ko Soraluzeko jaietarako erraldoi parea sortzeko. Horrekin batera, inguruko herrietan dauden erraldoi motak erakutsi zituzten, Oñatikoak eta Aretxabaletakoak, besteak beste, eta erraldoien tamaina, pisua, haiekin dantzatzeko beharrezko ezaugarriak... aztertu zituzten, Joxerra Perezen azalpenei esker.
Datozen asteetan landuko dute erraldoi horiek zein lanbide, pertsonai edo izaki mitologikotan oinarrituko diren, beti ere Soraluzerekin lotura dutenak.
Erraldoiak egitearekin batera, horiek dantzatu eta erabiliko dituztenen taldea osatzea ere beharrezko ikusten dute. Atzoko bileran hainbatek interesa agertu zuten eta datozen asteetan jende gehiago biltzen joatea espero dute. Probatu eta ikasten joateko, Perezek prestutasuna agertu zuen Arrasateko Erraldoi eta Kilikien konpartsako lokalera gerturatu eta bertako erraldoiak probatu ahal izateko.
Oro har, argi laga nahi izan zuten luzera begirako kontua dela eta ardura hartzeko prest dauden gutxi batzuk behintzat beharko direla. Udalak abiapuntua jarri badu ere, bere kabuz antolatu eta funtzionatuko duen konpartsa bat osatzea da helburua. Gaiarekiko interesa duenak Udalera jo dezake, baita datozen asteetan egingo diren bilera irekietara hurreratu ere.