Gaur eta bihar, elikagai bilketa egingo dute hainbat saltokitan, Dena ematen dugu lelopean. Gipuzkoako Elikagai Bankuaren helburua da pertsonako kilo bat elikagai batzea. Soraluzen, besteak beste, Kooperatiban ari dira elikagaiak batzen, baina eguerdian, kaxak huts samar zeuden oraindik. Dilistak, garbantzuak, fardelak, arroza… batzen ari dira.
Soraluzetik gertuen, Bergaran du biltegietako bat Gipuzkoako Elikagaien Bankuak eta komunikabideetan esandakoaren arabera, une honetan hutsik daude bertako apalak. Izan ere, hilero, gutxienez, 3.000 kilo elikagai banatu behar izaten dute. Kopuru hori da gaur egungo hartzaile kopurua kontuan hartuta.
Gaur eta bihar egingo duten bilketaren helburua da gipuzkoar bakoitzak kilo bat ematea. 730.000 pertsona inguru bizi gara probintzian; hortaz, kopuru hori kilotan jasotzea da helburua. Iaz 684.000 kilo batu zituzten.
