Gaur, martitzena, hasi dira lurreko margotze-lanak egiten Ezozibiden eta esandakoaren arabera, bihar bukatuko dituzte; beraz, ordura arte ezin izango dira hango aparkalekuak erabili. Zirkulazioari dagokionez, berriz, ez dute ibilgailuen joan-etorririk eten, txandaka bideratu, baizik.
Zebrabideak, aparkalekuak eta pasatzen uzteko seinaleak ari dira margotzen. Seinale horietako batzuekin auzoan oinezkoen lehentasuna bermatu eta ibilgailuen joan-etorria mugatuko dute.
Tiesto gehiago
Bestalde, asteotan, tiesto gehiago jarri dituzte auzoko hainbat puntutan: edukiontzien aurrean, zebrabide hasieran, eta errebuelta funtzioa betetzeko esparruetan, besteak beste. Lehenago garaje aurreetan jarrita zeuden tiestoen moduan, batik bat pibote funtzioa beteko dute berriek. Kasu batzuetan, garajeetarako sarbidea bermatzeko, besteetan, aparkatu ezin den lekuetan aparkatzea galarazteko.
Esandakoaren arabera, piboteak baino estetikoagoak direlakoan jarri dituzte tiestoak eta hainbat tiesto dagoeneko lurrez bete eta landarez hornitu dituzte; zuhaixkak jarriko dituzte, zaintzeko errazagoak.
Gai horrekin, baina, hainbat auzotar ez daude oso pozik. Diotenez, tiesto larregi dira, ez dira behar den moduan zainduko eta zikinkeriaz beteko dira, “esan auzotarrok ez dugula halakorik nahi”, diote.
Jarlekuak eta parkea
Tiestoez aparte, bederatzi jarleku ere ipini dituzte parke inguruko espaloian, baina oraindik lotzeke daude; batzuk parkera begira jarriko dituzte eta beste batzuk errepidera begira, ahalik eta erabiltzaile gehienen nahiak aintzat hartuta. Eta besteak beste, jolasparkea ipintzeko lanak ere egingo dituzte urtea amaitu aurretik.