Errigorako antolatzaileek jakinarazi dutenez, udazkeneko kanpainaren logika aurreko urteetako berbera izango da. Hiru saski desberdin jarriko dituzte salgai Ager zonaldean (Nafarroa erdi eta hegoaldean) ekoiztutako produktuekin osatutakoak, eta saltzen den saski bakoitzeko balioaren %25a bertako euskalgintzako eragileek jasoko dute.
Hiru saski hauek (beltza, berdea eta gorria) eskuratzeko aukera azaroaren 13 arte izango da zabalik Errigoraren webgunean. Plazentziatarrek euren eskariak azaroaren 25ean jaso ahalko dituzte Gaztetxean, 18:00etatik 19:30era bitartean.
Iaz udazkeneko kanpainarekin Errigorak 230.000 eurotik gora bideratu zizkion Nafarroako euskalgintzari.
“Ezinbestekoak euskararentzat Agerrean”
Errigorak ondorengo mezua zabaldu du udazkeneko kanbpainaren leloa azaltzeko: "Nafarroa erdi eta hegoaldean lanean ari diren euskalgintzako eragileak (AEK, Sortzen, Ikastolak eta Agerraldia) ezinbestekoak dira euskararentzat. Euskarak zonaldean arnasa har dezan bertatik eta bertarako egiten dute lan. Zuhaitz bat balira bezala hizkuntza sustraitzeko lanetan ari dira, baina baita bertako euskaldunek arnasa har dezaten aire kutsatua garbi bilakatzen ere. Udaberriro-udaberriro loratzen dira, hizkuntza ez dadin zimeldu.
Lanean jarrai dezaten, ezinbestekoak garenak gainontzeko lurraldetako euskalzaleok gara. Asmo horretan auzolana tresnarik baliotsuena, ezinbesteko elkartasun-keinua da Euskarari Puzka kanpaina, saskiak eskatuz balioaren %25a Ager zonaldeko euskalgintzara bideratzen delako".