Bizilagun askori luze ari zaizkie egiten baina ari da amaiera ailegatzen eta beste ezustekorik ez bada, hilabete honetan bertan bukatuko dituzte Ezozibidea berriro urbanizatzeko lanak.
Obrak egiten diharduen Artzamendi enpresatik emandako xehetasunen arabera, bizilagunei buruhaustea eragiten ari zaizkien ur-filtrazioak konpontzeko lanak egiten ibili dira. Orain, lehen euri zaparradekin ikusiko dute ea ondo drainatzea lortu duten ala ez.
Horrez aparte, gaur baranda berria margotzen ibili dira, uger kolorez. Horrekin batera, zoruari oinezko-gune itxura emateko inpresioa egiten ibili dira, harlauza-harri itxura emanez. Hori Irungo Impires enpresa ari da egiten eta esandakoaren arabera, gero, gorriz margotuko dute zorua, herriaren erdigunean dagoen moduan.
Horren helburua da argi adieraztea auzoan oinezkoek dutela lehentasuna. Halaber, oinezkoak babestu eta hortik pasatzen diren autoek abiadura muga dezaten bestelako neurriak ere hartu dituzte: errebuelta berriak sortu, aparkalekuak errepidearen albo bietan jarri eta bi zebrabide altxatu ipiniko dituzte.
Bestalde, auzoko parkean, barruko aldeko esparruan baldosa batzuk ipintzea falta da, eta ingurua zabuz ere hornituko dute; hain justu, hilabeteotan futbol zelaiaren aparkalekuan daude zabuak lagata, bere lekura bueltatzeko zain.
Behin hori ere bukatuta eta dena ondo bidean, urrian bertan bukatuko dituzte Ezozibideko lanak.