1970-1980ko hamarkadan, Soraluzeko neska-mutiko askok eskubaloian jokatzen zuten, bai herrian bertan eta baita Eibarren ere. Domeketan, mezetatik irten eta 12:15 inguruan izaten ziren partidak, ikuslez beteta egoten zen frontoian. Eibarrera ere joaten ziren soraluzetarrak haien kontra jokatzera. Han, Untzagan jokatzen zzuten.
Luis Ariznabarreta Edurtza tabernako ugazabak kontatu duenez, orduan, futbolak ez zuen horrenbesteko indarrik herrian. Sorak ez zuen futbol zelairik bertan, eta, Mendarora joan behar izaten zuten partidak jokatzera. Herrian, berriz, eskubaloi ekipoak eta partidak ziren errege.
Aurkezpena Zeletako ur-depositoan
Ariznabarretak gogoan du Sora eskubaloi taldearen aurkezpena egiten zutela Zeletako ur-depositoaren berdegunean; gogoan du, baita ere, norberaren arropak norberak erosten zituela, “kamisetaren zenbakia Santa Ana Kirolak dendan egin eta gero josi”, gaineratu du. Kontatu duenez, eurek Gotzon Elizburu zuten entrenatzaile, eta, domeketako partiden amaieran, hark zozketa egiten zuen jokalarien artean, Mendarora Soraren futbol partidua ikustera berarekin joateko.
Halako oroitzapenak dituzte gordeta Edurtza tabernan ikusgai dauden 15 bat argazkiek. Bertan azaltzen dira, adibidez, Luis Ariznabarreta bera, Jesus Juan Benito, Gotzon Elizburu, Oskar Gabilondo, Migel Bedaio, Aitor Ormazabal, Bobbie, Arrate, Marimar Urrutia, Ramonita Pardo, Gurutze Benito… Hilabetez ikusgai izango dira.
Ariznabarretak azaldu duenez, asmoa du aurrerantzean, Soraluzen izandako kirol batekin lotutako argazki erakusketa jartzeko tabernan urtean behin.