Atzo, 19:15-19:30ak inguruan izan ziren gertakariak. Lekukoak kontatu duenez, Gaztelupe ingurutik ikusi zuten zerbait pasatzen ari zela U-an (skate gunean), eta, ikusi zuten bi gazte elkarri kolpeka eta 12-22 urte bitarteko gazte mordoa begira, zirkulua eginda. Esandakoaren arabera, gazteetako bat Soraluzekoa zen “baina besteak kanpokoak ziren eta itxura zuen borroka antolatutako zerbait zela, eta, ez zela lehen aldia”.
Udaltzaingoa eta Ertzaintza ere bertaratu ziren, baina esan dutenez, ordurako dena zegoen bukatuta eta eurek ez zuten borrokarik ikusi.
Lekukoak, berriz, gertatutakoari buruzko kezka mahai-gaineratu du: “Oso kezkagarria da ze umeak han ibiltzen dira jolasten eta halakoak normalizatzen hasten badira… bestalde, atzo euren artean ibili ziren borrokan baina bihar agian ingurukoak jipoitzen ere has daitezke. Eta atzo, ez zen beste ezer gertatu, baina hurrengoan akaso bai. Oso kezkatuta gelditu gara. Mara bat zirudien”.