Azken bi urteotan, tradiziozko Karidadeko salda partituz ospatu dituzte San Martzialgo jaiak. Aurten, berriz, berritasunak batu zaizkio hari, eguerdi partean musika, dantza, jan-edana eta bisitari berezia izango baitira San Martzialen.
Zapatuan, goizago hasiko da eguna San Martzialen, 05:00etan hasiko baitira Karidadeko salda prestatzen eta 09:30ean hasiko dira hura banatzen ermitaren estalpera gerturatzen direnei.
Eguerdian, berriz, bisitari berria azalduko da auzoan: Zelemeterio. Auzoko San Emeterio eta San Zeledonio zaindarien batuketatik izena hartu duen pertsonaia ezagutaraziko dute. 12:00etarako iragarri dute haren etorrera.
Dantzarako errepertorio osatua
Eta segidan, musikak eta dantzak hartuko dute auzoko plaza. Musikari jardungo dute herriko txistulariek eta bailarako arrabitariek. Domentx Uzinek konposatutako Ezozia fandango eta arin-arina, Lantzeko zortzikoa, Polka borobila, Ball Rodó eta Menarhens, Mariana eta Plazentziatarra jauziak, Banakoa… Errepertorio osatua dute gertu jendea dantzan jartzeko. Eta plazako giroa animatzeko, Urrats Dantza Taldeak dei egin die herriko dantzazaleei bertaratu daitezen.
Azkenik, goiz-eguerdia borobiltzeko, 14:00etan elkarrekin bazkalduko dute lagunek eta parte-hartzaileek.