Atzoko karga-proba egiteko, lau enpresatako adituak bertaratu ziren Gabolatseko zubira: URA Agentzia, Intec, Sestra eta Moyua. 10:00ak inguruan hasi ziren probarekin eta 13:00ak inguruan bukatu zuten.
Zubi berriari hiru karga-eskaloi jarri zizkioten. URA Agentziako Pablo Murga obra-zuzendariak esplikatu zuenez, karga-eskaloi bakoitzarekin, zubiko 9 puntutan neurketak egin zituzten eta haien emaitzak teoriak dioenarekin konparatu, bestela esanda, zubia zenbat jaisten den eta kargak kendu ondoren, zenbat berreskuratzen duen neurtu.
Piszinak eta kamioiak
Hain justu, oinezkoen esparruan, urez betetako 12 piszina jarri zituzten. Guztira, 15.000 litro ur. Bakarrik piszinak jarrita zeudela, Intec enpresako topografoak 10 minutuz neurtu zuen zubiaren erreakzioa, Sestraren aholkulari teknikoen asistentziarekin.
Segidan, nahikoa maniobra eginda, lehen kamioia sartu zuten ibilgailuen gunera, 26 tonakoa. Hura beste 10 minutuz izan zuten bertan eta zubiaren erreakzioa neurtu. 10 minutuak pasatutakoan, bigarren kamioia sartu zuten, beste 26 tonakoa, eta, gauza bera egin zuten, bi kamioiak 10 minutuz bertan zirela neurketa berriak egin zituzten.
Proba gaindituta
Behin ikusi zutenean guztira zenbat jaitsi zen zubia, kontrako prozedura egin zuten, hau da, lehenengo kamioi bat atera zuten eta zubia zenbat igotzen zen konprobatu. Gero, bigarren kamioia atera eta gauza bera egin zuten eta azkenean, piszinak hustu eta neurketa berbera egin zuten.
Emaitzaren arabera, Gabolatseko zubi berriak gainditu egin du karga-proba. Gainera, obrak martxa onean doaz, batik bat oinezkoen pasokoak. Atzo azken galtzada-harriak jartzen zebiltzan.
Oinezkoen pasoa zabaltzear
Gauzak horrela, URA Agentziako Murga zuzendariak esandakoaren arabera, oinezkoen pasoko lanak bukatu ahala zabaldu egingo dute hura, herritarrek orain arteko buelta ematen segi ez dezaten. Xehetasunen arabera, datozen egunotan zabalduko dute. Aldi berean, ibilgailuen pasabideko lanak egiten bukatuko dituzte.