Eguzkiaren berotasunetik babestuz, Plaza Barrixan deitutako mobilizazioa metro batzuez aldatu eta udaletxeko aldapan egin dute Aske maitte, harro bizi! leloarekin LGTBIQ+ kolektiboaren eskubideak, aniztasuna eta harrotasuna babesten duen elkarretaratzea.
Elkarretaratzea deitzeaz bat, Soraluzeko Udalak adierazpen instituzionala ere plazaratu du gaurko eguna aldarrikatzeko. Bertan, besteak beste, azpimarratu dute ezin direla “onartu ideologia faxistak defendatzen dituzten taldeen itzulerak eta baita foro publiko jakin batzuetatik izaten diren saiakerak ere, LGTBIQ+ kolektiboaren eskubideei eta pertsona guztien berdintasunari buruzko zalantzak sortzea, ez eta gizartean jarrera hauek arrakasta eta eragina izatea ere”.
Horregatik uste dute “inoiz baino garrantzitsuagoa” dela “nondik gatozen ospatzea eta aldarrikatzea”, eta erasoen kontra “antolatzea eta borrokatzea”.
Halaber, konpromisoa publikoa plazaratu dute herriko “LGBTIQ+ mugimenduko kide eta norbanakoekin prozesu bat abiatu eta elkarrekin Soraluzeko egoera lantzeko”. Horretarako, iragarri dutenez, 2025eko udazkenean zehar Xerka izeneko hitzaldi eta erakusketa antolatuko dute, besteak beste.