Danborradako antolaketa taldetik jakinarazi dutenez, datorren astean, ekainaren 17an hasiko dituzte aurtengo entseguak. Uztailaren 17ra bitartean, martitzenero eta eguenero elkartuko dira 19:30etik 20:30era frontoian. Entsegu orokorra, berriz, uztailaren 22an izango da, 19:30ean. Eta danborrada, bera, uztailaren 25ean, 22:00etan irtengo da.
Zortzi bat konpainia
Aurreikuspenaren arabera, zortzi konpainia irtengo dira eta pieza berria estreinatuko dute, Domentx Uzin musikariak 2016an txistu bandarendako konposatutako Atxolin biribilketa. Konpainietako zuzendariak hasita daude pieza hori ikasten, datorren astetik aurrera barrileroei eta danborrei erakusteko. Danborradan, berriz, txistulariak ere izango dituzte lagun.
Atxolin biribilketa 2017ko herriko jaietan jo zuen lehen aldiz txistulari bandak. Imanol Lopezen Nire Plazentziatxo pieza ere estreinatu zuten kontzertu hartan. Biribilketari dagokionez, Domentx Uzin soraluzetarrak konposatu, Juan Carlos Larreategi maisu elgoibartarrak bideratu, eta partitura txukun argitaratzen Eugenio Garcia arrasatearraren laguntza izan zuen.