Ohikoa den moduan, dantza izango da Erromerixa Egunaren ardatza baina aurten ere, antolatzaileek beste osagai asko erantsi dizkiote egitarauari.
Hala, eguerdiko 12:30ean txorixo egosia eskainiko dute eta ostean, plaza-dantzak dantzatzeko aukera izango da Diadar taldeko txistulariek eta bailarako arrabitariek girotuta.
15:00ak aldera, Bizimina elkartekoek gertu izango dute paella eta aurrez izena eman dutenek elizpean bazkalduko dute.
Arratsaldean, sagardoa, gazta eta erromeria
Arratsaldean, 18:00etatik aurrera, sagardoa eta gazta dastatzeko aukera izango da, Elgoibarko Lizagasar Sagartokixaren eta Egotzakoen eskutik. 5 euro ordainduta, nahi beste sagardo edan eta gazta jan ahalko da.
Belaxe, 18:30ean, hasiko da Eingo taldea erromeria girotzen. Askotariko plaza dantzak joko dituzte: fandango eta arin-arinak, polkak, jauzi-dantzak, korrokoak, banangoa... Kantuak ere izango du bere lekua, tartean tartean, jendea elkarrekin kantatzera gonbidatuko dute eta.
Bitartean, bolatokia zabalduko dute eta edozeinek izango du bola jaurtitzeko aukera. 19:00etatik aurrera, berriz, parte hartu nahi dutenek Ezoziko Bola Premioa jokatzeko aukera izango dute.
Egun osoan zehar, Galtzagorri Jai Batzordeko kideek barra zerbitzua eskainiko dute.
