Zapatura arte segituko dute edukiontzi marroia zabaltzeko txartelak banatzen

Ubane Madera Zangitu 2025ko api. 3a, 10:00

Bi herritar txartelak eskatzen, atzo, Kalebarren 8ko bulegoan.

Egunotan, etxeetan zein Kalebarren 8ko bulegoan edukiontzi marroietarako txartel berria jasotzen ari dira soraluzetarrak. Hain justu, posta bidez ari dira jasotzen txartela lehenagotik poltsa konpostagarriak hartzeko txartela zuten soraluzetarrek. Gainerakoei, berriz, gutun bidez ari dira jakinarazten Kalebarren 8ko bulegoan zain dituztela txartelak. Zapatu arratsaldea baino lehen hartu behar dira. Astelehenean bertan itxita izango dira edukiontzi marraioak eta bakarrik txartel bidez zabaldu ahalko dira.

Egunotan, Kalebarren 8ko bulegoan edukiontzi marroiak zabaltzeko txartelak partitzen ari dira. Mordoska bat dituzte bertan, eta zapaturako banatuta izan beharko dituzte, bulegoa zapatura arte izango baita zabalik.

Txartelak bulegoan hartzeko dituzten herritarrei gutun bidez ari zaie jakinarazten hori. Atzo iluntzean, eguaztena, esandakoaren arabera, oraindik txartel gutxi eman dituzte, baina egunetik egunera jende gehiago ari da bertaratzen, etxeetara jakinarazpen gutunak iristen ari diren seinale.

Bulegoa goizez zein arratsaldez dago zabalik, honako ordutegiarekin:

  • Eguena eta barikua: 10:00 - 14:00 eta 17:00 - 20:00
  • Zapatuan: 10:00 - 14:00

Beste herritar askori, berriz, lehenagotik poltsa konpostagarriak hartzeko txartelak zituzten herritarrei etxera ari zaie txartel berria ailegatzen, informazio-orriarekin batera.

Hain justu, txartel berriarekin posta konpostagarriak hartzen segitu ahal izango da Kontzejupeko makinan.

Txartel birtualak

Bestalde, etxe bakoitzeko txartel bakarra izango da. Baina txartel birtualak eskuratzeko aukera ere badago. Horretarako honako pausoak segitu behar dira:

  • Txartel berriak duen QR kodea birritan eskaneatu.
  • Esaten duen aplikazioa jaitsi.
  • Aplikazioak nahi beste txartel birtual izateko aukera emango du.

Edukiontzi marroiei dagokienez, astelehenean, apirilaren 7an bertan itxita izango dira eta bakarrik txartel berriak erabilita zabaldu ahalko dira. Horretarako, txartel berria edukiontziak izango duen aparailura gerturatu behar da, txartela bertikalki ipinita, eta, pare bat segundoz geldi eduki, harik eta argi berdea piztu arte. Orduantxe zabaldu ahal izango da edukiontzi marroia. Soraluzetarrek bakarrik herri barruko edukiontziak zabaldu ahal izango dituzte txartel bitartez.