Egunotan, Eibarko Urkotroniken biltegian ari dira gordetzen Debabarreneko udalerrietan Zaporeak proiektuari laguntzeko emandako elikagaiak.
Soraluzeren kasuan, arroz luzea batzea egokitu zitzaion eta emaitza ikusita, esan herritarrak oso eskuzabalak izan direla; guztira, 510 kilo arroz batu ziren Kooperatiban, Amparo saltokian, Eroskin eta Kontzejupean jarritako mahaian eta beste 530 kilo Soraluzeko Udalak eman ditu.
Zaporeak proiektuko arduradunek eskerrak eman dizkiete elkartasun ekimen honetan parte hartu duten herritar eta boluntario guztiei. "Zuenak bezalako eskualdeek posible egiten dute gure proiektuak aurrera jarraitzea eta guk lanean jarraitu ahal izatea. Zuen laguntza oso garrantzitsua da milaka pertsonak, haurrek, gizonek eta emakumeek janari duina jasotzen jarrai dezaten beraien migrazio bidean", esan zuten bilketaren amaiera ekitaldian, Ermuan.