Atzo, martitzena, Gipuzkoako Foru Aldundiko Gazteria Zuzendari Isaac Palencia, Soraluzeko alkate Unai Larreategi, Soraluzeko Haur eta Gazte Saileko zinegotzi Maite Quintanilla eta Elgoibarko Udaleko Gazteria eta Hezkuntza teknikari Maialen Aranguren Gaztelekuan izan ziren, TREBA Nerabeak prestakuntza-programa berria aurkezten.
Azaldu zutenez, “12 eta 16 urte bitarteko gazteek beren garapen pertsonalerako funtsezko tresnak gara ditzaten” laguntzea da programaren helburua eta horretarako, “ongizate emozionala, begirada kritikoa, sexualitatea eta bizitzarako trebetasunak, eta arlo bakoitzean oinarrizko eta sakontzeko ikastaroak” eskainiko dituzte.
Soraluze lehen herria
Gipuzkoako 66 udalerrietan garatuko da prestakuntza-programa berria eta hasi, Debabarrenean hasiko da. Haren barruan, apirila eta maiatza bitartean, bost ikastaro egingo dituzte sexualitateari, bizitzarako tresnei eta ongizate emozionalari buruz Soraluzen, Deban eta Elgoibarren, hurrenez hurren. Eta udazkenean, berriz, Mutriku eta Eibar batuko dira programara.
Diputazioko Gazteria Zuzendari Isaac Palenciak azpimarratu zuenez, haurtzaroan zein nerabezaroan gazteen garapena pertsonala babesteko “funtsezkoa da emozioak, autoestimua edo besteekiko harremana kudeatzeko tresnak izatea. Nabarmendu nahi dut gaur aurkezten ditugun hitzaldiak lurralde osoan garatzen dugun estrategia baten parte direla. Guztira 290 saio egiten ditugu, eta horien gaiak udal bakoitzarekin adostu dira, herri bakoitzaren beharretan oinarrituta”.
Sexualitatea
Soraluzeren kasuan, Sexualitatea da landuko duten gaia. Maite Quintanilla zinegotziak azaldu zuenez, “Gaztelekuko hezitzaileek gazteekin duten harremanean sentitutako beharrari eman nahi izan zaio erantzuna. Sexualitatearen ikuspegi distortsionatua deseraiki eta sexualitatea ikuspegi inklusibo nahiz kritiko batetik begiratzeko aukera eskainiz, tratu onak mahai gaineratuz. Argi daukagu, gure herrietako gazteentzako eredugarri izan behar dugula Gaztelekua bezalako zerbitzuetan eta eskaini behar diegula bizitza bizigarri baterako informazio eta tresna eredugarriak konfiantzatik eta babesgune batetik abiatuz”.
Bi saio, lehena zapatuan
Hain justu, sexualitatearen gaia lantzeko, bi saio izango dira Gaztelekuan, Ageda Blasco adituak gidatuta.
Lehena, zapatu honetan izango da, oinarrizko ikastaroa, Sexualitatea ezagutuz: emozioak, desira eta tratu ona izenburuarekin. Gaztelekuan izango da, 17:00etan hasita.
Xehetasunen arabera, sexualitatea ikuspegi zabal, inklusibo eta kritiko batetik landuko da, eta espazio seguru bat sortuko da nerabeek beren zalantzak eta esperientziak partekatzeko. Partaidetzazko metodologien bidez, emozioak eta desira esploratzea erraztuko da, adostasunari, tratu onari, sexting-ari eta sextortsioaren prebentzioari buruzko funtsezko kontzeptuak jorratuz.
Bigarren saioa praktikoagoa
Bigarren saioa, berriz, sakontze ikastaroa izango da, praktikoagoa, honako izenburuarekin: Aniztasuna eta afektuak: harreman osasuntsu eta askeak eraikitzen.
Maiatzaren 17an izango da. Besteak beste, tresna praktikoak eskainiko dituzte, nerabeek abusu-egoerak identifikatu, prebenitu eta horiei aurre egin ahal izateko, adostasunean eta enpatian oinarritutako harremanak sendotuz.
Izen-ematea
Soraluzeko bi ikastaroetan parte hartzeko, izena eman beharko da. Horretarako bi bide egongo dira:
- Udaletxeko harrera bulegoan: astelehenetik barikura, 9:00 - 14:00
- Gaztelekuan
Bi ikastaroetan plazak mugatuak dira eta horiek gainditzen badira, zozketa egingo da. Izena emateko azken eguna apirilaren 3a, eguena, izango da.
Elgoibarren ongizate emozionala
TREBA Nerabeak programaren aurkezpenean izan zen Elgoibarko Udaleko Gazteria eta Hezkuntza teknikari Maialen Arangurenek azaldu zuenez, berriz, Elgoibarren ongizate emozionala landuko dute TREBA Nerabeak programaren baitan. “Euskadiko gazteen artean, 5etik 1ek osasun mentalaren alterazio bat du diagnostikatuta, eta azken urteetan antsiolitikoen kontsumoa 6rekin biderkatu da, batez ere nesken artean. Arangurenek, besteak beste, gaineratu zuen Elgoibarko Udalak parte hartuko duela, baita ere, Zurrunbiloa proiektuan. “Proiektu horretan, herrian ikasten duten 12-16 urteko nerabeen ahotsa jasoko da, bai eta gazteek bizi duten egoerari eta buru-osasunari buruzko informazioa ere”.
TREBA Nerabeak programa Gipuzkoako Foru Aldundiaren 17 eta 21 urte bitarteko gazteentzako TREBA Gazteak programari gehituko zaio.
Debabarreneko agenda osoa
- SORALUZE: Gaztelekua, apirilak 5 (17:00) Sexualitatea ezagutuz: emozioak, desira eta tratu ona.
- DEBA: Gaztelekua, maiatzak 8 (16:00-18:00) Bizitzarako trebetasunak: oinarrizko ikastaroa.
- ELGOIBAR: Gaztelekua, maiatzak 14 (18:00) Emozioak: oinarrizko ikastaroa.
- SORALUZE: Gaztelekua, maiatzak 17 (17:00) Aniztasuna eta afektuak: harreman osasuntsu eta askeak eraikitzen.
- DEBA: Gaztelekua, maiatzak 22 (16:00- 18:00) Bokazioa eta etorkizunerako erabakiak-hartzea.
- ELGOIBAR: Gaztelekua, urria Ongizate emozionala: kontzientzia eta gorputza.
- MUTRIKU: Urria Begirada kritikoa: oinarrizko ikastaroa.
- EIBAR: Urria Ongizate emozionala: kuadrilen saltsak.
- EIBAR: Zehazteko. Ongizate emozionala: oinarrizko ikastaroa.
- MUTRIKU: Zehazteko. Begirada kritikoa: Fake news.