2022an
Hiru urte pasa dira, uda garaian, hau da, udaberriko ordu aldaketatik udazkeneko ordu aldaketara, gabeko hamaiketako kanpaiak jo ostean, goizeko zazpiak arte kanpaiak isilaraztea eskatu genuela. Gure eskaria ez da inondik inora egunez kanpaiak kentzea, gabez baizik.
Soraluzen, gauez ordu laurdenero jotzen dute kanpaiek, eta beroak hasten direnean etxe batzuetan ezinezkoa da leihoak irekitzea. Ez dugu ondo lo egiten eta deskantsua oinarrizko eskubidea da, legeak horrela babesten du.
Izan ere, Deba bailarako herri guztietan, bitan izan ezik, gauez kanpaiak kenduta daude.
Eskaria egin genuenean, parrokiako arduradunek egun guztian zehar kendu zituzten kanpaiak, gure ezadostasuna adierazi arren. Herritar batzuk sinadurak batuz, 24 orduz kanpaiak ipintzea eskatu zutenez, berriz jarri ziren.
2023an
Garaian zegoen apaizarekin bildu ginen, eta honek gure eskaria logikoa zela esanez, erlojuaren konponketaren ardura udalak hartuz gero ez lukeela arazorik izango gauez kentzeko hitza eman zigun. Ordutik pasa dira bi urte.
2024an
Udalak onartu zuen erlojuaren konponketaz arduratzea, momentu honetan aurrekontuaren zain dago. Hala ere, parrokiako arduradunek ez zuten bere hitza bete eta ez zituztela kenduko esan zuten iaz.
Hori ikusita, azkenean gure kexa Arartekora helarazi behar izan genuen, eta honek Udalaren gain laga zuen erabakia, herritarron kexa kontuan hartu beharra zegoela esanaz. Udalak, beste herri batzuetan egin den bezala, neurketak egitearen erabakia hartu zuen. Dezibelioak legeak esaten duena baina altuagoak balira kanpaiak kentzeko erabakia hartuko zuela esanez.
2025ean
Neurketak egiteko enpresa bat kontratatu zuen Udalak. Neurketen emaitza izan da dezibelioak legeak permititzen duena baino askoz altuagoak direla.
Hala ere, parrokiako arduradunek diote orain, neurketak egin zirela kanpaiak errepikeakin joaz eta ez dutela baliorik.
Gure ustez, errepikeakin ala errepike barik, dezibelioak berdinak izango dira, baina Udalak erabaki du berriro ere egingo direla neurketak zalantzarik ez egoteko.
Argi utzi nahi dugu zein izan den gure eskaria hasieratik: ez dugu zerikusirik egunez kanpaiak kentzearekin. Esan digutenez, orain kenduta daude ordenagailua matxuratu delako neurketak egin dituztenean.
Gure eskaera hau izan da orain arte: udaberriko ordu aldaketatik udazkeneko ordu aldaketara, gabeko hamaiketako kanpaiak jo ostean, goizeko zazpirak arte kanpaiak isilaraztea.
Beti nahi izan dugu hitz eginez gauzak konpondu eta erdibideak topatu, baina ez da posible izan. Horregatik orain eskatzen dugu legea betetzea, eta gauez kanpaiak kentzea.