Atzo hasi zen Lesbosen bizi diren errefuxiatuei laguntzeko elikagai bilketa Debabarrenean, Zaporeak Gobernuz Kanpoko Erakundeak bultzatutakoa. Soraluzen, Kontzejupean jarri zuten horretarako mahaia eta atzo bertan bi kajakada arroz luze batu zituzten.
Mahai hori, barikura arte, iluntzero izango da Kontzejupean arroza batzen, herriko boluntarioen eskutik, 17:30etik 19:30ak bitartean.
Horrez aparte, Kooperatibara, Amparo saltokira, Eroskira, Plaentxi Eskolara zein Institutura ere eraman daiteke arroza.
Debabarrenean zer
Debabarreneko gainerako herriei dagokienez, berriz, Ermuan eta Deban arroz biribila batuko dute, Mallabian eta Mendaron makarroiak, Eibarren dilistak, Elgoibarren garbantzu pedrosillanoa eta konserbako arraina Mutrikun.
Debabarreneko janari-bilketa borobiltzeko, zapatuan, Tuper solidarioa ekimena egingo dute, 14:00etatik 15:00era bitartean, Ermuko Orbe Kardenalaren plazan. Ekimen horretan, 5 euroko dohaintzaren truke Zaporeak elkarteko sukaldari laguntzaileek prestatutako tuperra eskuratu ahal izango dute parte-hartzaileek.
Egunero 2.000 otordu
Gobernuz Kanpoko Zaporeak erakundeak egunero 2.000 otordu kozinatzen eta banatzen ditu Greziako Lesbos uharteko kanpamentuan gatibu dauden pertsona errefuxiatuen artean.