Mapfreko Soraluzeko Ainhoa Ibarzabal ugazabak kontatu duenez, atzo, 23:15ak aldera gertatu zen lapurreta saiakera. Ibarazabali inguruan zebiltzan bizilagunek kontatutakoaren arabera, zaratak entzun zituzten eta gero bizpahiru lagun aurpegia estalita zutela ikusi zituzten. Esan diote, baita ere, pareko atarian sartzen ikusi zituztela.
Bizilagunetako batek Ertzaintzari abisatu zion eta Ibarzabal bera ere bertaratu zen. Atearen kristala saltoki barruan zegoen, guztiz apurtu barik, paretaren kontra lagata. Horrek nabarmen zailtzen zuen dendara sartzea. Kontuak kontu, ugazabak igarri zuen norbait barruan ibili zela, ze mahaiko kaxoiak zabalik topatu zituen. Hori bai, momentuz, ez du ezer faltan igarri.
Hirugarren aldia da Mapfre aseguru etxera sartzen direla, sei hilabetean bigarren aldiz.
