Aurtengo San Blas eguneko elizkizuna Joseba Gonzalez parroko berriak emango du. Kontatu duenez, zuzenean ez da inoiz bertan egon baina badu Soraluzeko ohituraren berri eta betiko moduan egingo du opilen bedeinkapena, parrokiako eta herriko ohituren arabera.
Lehiaketa
Horren ondoren, 12:00etan, Soraluzeko Udalak antolatutako San Blas opilen lehiaketa izango da, Plaza Berrian. Edozeinek parte hartu ahal izango du bertan; hori bai, 16 urtez azpikoei dagokienez, heldu batek lagunduta parte hartu beharko dute.
Udaletxeko harreran eman daiteke izena -gaur da azken eguna- edo egunean bertan, lehiaketa hasi baino ordu erdi lehenago. Sariei dagokienez, berriz, hiru sari izango dira, 50 euro, 30 euro eta 20 euro.
Itxaropenan opil banaketa
San Blas eguneko ospakizunekin bukatzeko, otsailaren 4an, martitzena, ospatuko dute eguna Itxaropena Erretiratuen Elkartean. Horretarako, txokolatea eta San Blas opilak banatuko dizkiete bazkideei martitzenetako bingoaren ondoren.