Zapatuan, Araneko erakusketa gelan egin zuten Kontrargiren Argazki Rallyaren sari banaketa. Udal ordezkariak, Unai Larreategi alkatea tarteko, bertan zirela. Baita Blues Hotsak jaialdiko antolatzaile Ubane Ucin ere, aurtengo sari berezia emateko. Ekitaldia hasteko, irabazleen argazkiak proiektatu zituzten; segidan banatu zituzten sariak.
Aurtengo txapelduna Carlos Mediavilla legazpiarra izan da, txapeldun bikoitza, gainera. Lehen saria eta Blues Hotsaken sari berezia eskuratu ditu. Mediavillak bestetan ere parte hartu izan du Soraluzeko argazki rallyan eta baita sariren bat zein beste irabazi ere. Horrez aparte, argazki-erakusketa bat ere ipinita dauka herrian.
"Nikonista"
Pozik hartu zituen opariak. Sari ekonomikoa -120 euro- gehi otarra, gehi Miguel Criadok egindako harrizko eskultura originala, aurten, arropak eskegitzeko pintza bat.
Mediavilla beteranoa da argazkigintzan. 50 urte baino gehiago daramatza argazkilari modura, txikitan hasita, amaren eskutik. Kontatu zuenez, soldaduska egin zuenean, Ceutatik ekarritako Yashica kamera batekin hasi zen eta orain, Nikona du gustuko. Bizitoki duen Legazpin, Ikatza elkarteko kide da, “han denak gara nikonistak”, esan zuen Mediavillak.
Bigarren sariduna, berriz, Arbil Iciar zarauztarra izan zen. Hark ere eskarmentu luzea du argazkilaritzan, sariak ere eskuratu izan ditu. Puntu oso gutxirengatik geratu zen hura bigarren. Edozelan ere, hark ere pozik eskuratu zituen sariak.
Hirugarren lekuan, Juan Carlos Romero ondarrutarra geratu zen. Hura ere beteranoa da argazkilaritzan eta rallyetan eta sariak ere eskuratu izan ditu nonahi.
Carlos de Cos saridun
Azkenik, herriko argazkilaririk onenaren saria Carlos de Cos ezagunarendako izan zen. Esan beharrik ez dago De Cosek argazkilaritzan duen ibilbide luze eta oparoa. Sari mordoa ere baditu, baita Kontrargiren Argazki Rallyko asko ere. Aurten, esaterako , Mendiko XXII. eta Udazkeneko XXVIII Argazki Rallya Carlos de Cosek irabazi berri du.
Sari banaketa eginda, datozen egunotan, Plaentxia.eus atariaren bitartez erakutsiko dira aurtengo argazki rallyko argazki sortak, sei guztira: Saritutako bildumak, Burdin hesiak edo Sareak, Hiru berdinak, Oleako presa, Udazken koloreak eta Blues Hotsak.