Bihar goizean, denetariko apaingarriak ekarriko dituzte Bergarako Garagune Fundaziotik Soraluzen jarriko duten postura: “Kandela usaindunak, argidun zuhaitzak, kristalezko botilak, zuhaitzetarako bolak, izarrak, artilezko ponpoiak, ipotxak… hainbat gauza eramango ditugu eta hortxe egongo gara herritarrei gure lanak erakusten eta jendeak Garagunea ezagutu dezan, bertan zer egiten dugun eta zer pertsona dagoen”.
Kontzejupean jarriko dute postua, 10:30etik 13:00ak bitartean eta besteak beste, Garaguneren Soraluzeko bi erabiltzaile izango dira bertan; izan ere, Soraluzetik Bergarako Garagune Fundaziora bideratzen dira erabiltzaileak.
Eguneko arreta zerbitzuak
Garagune Fundazioa “interes sozial, pribatu eta irabazi-asmorik gabeko erakundea” da, “adimen-desgaitasuna duten helduei eguneko arreta-zerbitzuak eskaintzen” diena. “Helburua kalitate-programak eskaintzea da, adimen-desgaitasuna duten pertsonek bizitza aberatsa izan dezaten”. Garaguneren programa guztiak Gipuzkoako Foru Aldundiko Gizarte Politikako Departamentuarekin itunduta daude.