2021ean hasi zen Soraluzeko Musika Eskola bekak eskaintzen, ikasturtero lau, errenta baxua duten familiei zuzenduta -errenta aitorpenaren arabera-. %100ean finantzatutako bekak dira, ume hasiberriei zuzendutakoak, Musika eta Mugimendua ikasteko bi eta Musika Kantuz ikasteko beste bi.
Aurten, bosgarren bat ere badago. Kasu honetan, lehenagotik zetorren bekadun batena. Instrumentua ikasteko beka eman diote Soraluzeko Udalari esker. Hartara, lehenagotik hasitako ikasketak segitzeko aukera izango du beka horri esker.
Klaseak ikusteko aukera
Soraluzeko Musika Eskolatik esan dutenez, nahiz eta bekak esleituta egon jada, irailean zehar aukera dago musika eskolako klaseei buruzko informazioa eskatzeko eta taldekoak diren klaseak ikustera etortzeko. Nahiko da hitzordua aurrez zuzendaritzarekin hitzartzea.