Atzo, astelehena, banatu zituzten aurtengo danborradako lehen jantziak, danbor-joleenak. Partaide guztiendako lain jantzi dagoela esan zuten antolatzaileek; hori bai, umeen danborradakoak erabiltzen ari direla ere kontatu zuten. Kontuak kontu, danborradarako prestaketak azken txanpan sartu dira. Gaur eta eguenean entseguak egingo dituzte; hain justu, eguenean kantinariak ere hasiko dira entseatzen. Bihar, berriz, barrilarien jantziak banatuko dituzte eta barikuan, gremioenak.
Jantzien banaketan, danborradaren aurretik haiek garbitzea gomendatu zieten antolatzaileek partaideei, azken danborradaz geroztik, 2018tik, merkatu plazan gordeta egon baitira trajeak.
Bestalde, gogora ekarri zuten uztailaren 23an egingo dutela entsegu orokorra, musikari eta guzti. Egun horretan konpainia guztien antolaketaren eta funtzionamenduaren gaineko xehetasun guztiak landuko dituzte.