Hastear da Gipuzkoako Bertsolari Txapelketaren sailkapen fasea. Gipuzkoako Bertsozale Elkarteak jakinarazi duenez, apirilaren 25ean hasiko da eta ekainaren 2an amaituko. Bitartean, 20 saio jokatuko dituzte 74 bertsolarik eta ostean, guztietatik hogeita hamalauk lortuko dute txartela udazkenean abiatuko den herrialdeko txapelketan kantatzeko.
Eneko Beretxinaga Zestoan
Sailkapen fasean kantatuko duten bertsolarien artean plazentziatar bat dago: Eneko Beretxinaga. Beretxinagak apirilaren 26an kantatuko du Zestoan, sailkapen faseko lehenengo bueltan.
Azken saioa Soraluzen
Horrez gain, antolakuntzak jakinarazi duenez, sailkapen faseko azken saioetako bat (bigarren bueltakoa), Soraluzeko Antzokian jokatuko da, ekainaren 2an.
Sailkapen faseko saio guztietarako sarrerak salgai daude dagoeneko, bertsosarrerak.eus atarian. Informazio gehiago Gipuzkoa Bertsotan webgunean.