Asteon ibili dira karta-joko txapelketak egiten Itxaropena Erretiratuen elkartean. Tutean 12 bikotek eman du izena, musean 7 bikotek eta briskan 3k, elkarteko zuzendaritzak nahi baino gutxiago, oro har. Kontuak kontu, txapelketa eginda, datorren martitzenean banatuko dituzte sariak, bingoaren ondoren, 18:30ean hasita.
Bestalde, eguenean hitzordu bikoitza izango dute Itxaropenan. Batetik, Gabonetako 50 otar zozketatuko dituzte elkarteko bazkideen artean. Bestetik, Santo Tomas eguna izanik, txistor pintxoak banatuko dizkiete bertaratzen direnei.
Gaur azken eguna
Azkenik, gogoan izan, gaur, abenduaren 15a dela Itxaropenako kuota (12 euro) zein loteria (5 euro) ordaintzeko azkeneko eguna. Loteriarekin lotuta, gogoan izan, baita ere, akats baten ondorioz, oker bidali zietela Itxaropena Erretiratuen Elkarteko bazkideei aurtengo loteria zenbakia. Berez, esan zieten hartutako zenbakia dela 19.152, baina, benetan jokatu duten zenbakia 19.512a da.