Eguen goizean banatuko dituzte 2024ko egutegiak saltokiz saltoki eta tabernaz taberna eta egun horretatik bertatik aurrera erosi ahal izango dira, 2 euroren truke, honako lekuetan:
- Okelia harategia
- Iñarra harategia
- Mendizabal okindegia
- Autoservicio Amparo
- Iratxo goxo-denda
- Marijose (Arcelus)
- Armendia jatetxea
- Txurruka jatetxea
- Asigor
Kontrargikoak gehi herritarrak
Egutegia Soraluzeko paisaiak, lekuak zein jarduerak erakusten dituzten 14 argazkiz dago osatuta, urteko hilabete bakoitzeko argazki bat gehi azala eta kontrazala. Argazkiok hainbat lagunek ateratakoak dira, Udalak egindako deiari erantzunez egutegian parte hartu duten argazki-zaleek.
Udalak emandako datuen arabera, aurten, guztira, 13 herrikidek bidali dituzte argazkiak, guztira, 24 argazki, eta, horien artetik sei aukeratu dituzte. Egutegia osatu dute Kontrargi Argazkilaritza Kolektiboko Mikel Valero eta Bittor Murguzur argazkilariek ateratako erretratuekin.
Datorren urtean berdin
Datorren urtera begira, berriz, formula berarekin segi nahi du Udalak, hau da, herritarren partaidetzaren bitartez osatu egutegia. Hori horrela, urtarriletik ekainera bitarteko tartea zabalduko du herritar argazkizaleen argazkiak jasotzeko eta ondoren, jasotakoen artean aukeraketa egingo du egutegia osatzeko. Xehetasunak emango ditu deialdia zabaltzen duenean.