Gaztañerre 2023

Gaztañerre Azokaren zertzeladak lotzen hasi dira, baina ziurgabetasuna dago behien gaixotasunarengatik

Ubane Madera Zangitu 2023ko urr. 6a, 10:06
Baserritarrak eta Udaleko eta Debemeneko ordezkariak atzoko batzarrean, eguena.

Hasita daude azaroaren 11ko Gaztañerre Azoka prestatzeko pausoak ematen. Atzo, eguena, Udalak eta Debemenek batzarra egin zuten baserritarrekin eta azokaren nondik norakoak lotzen hasi ziren. Besteak beste, jakinarazi zuten barazkigile bik parte hartuko dutela, eta, ganaduzaleei dagokienez, parte hartzeko prestutasuna izan arren, behien artean zabaltzen ari den gaixotasun hemorragikoaren ondorioz, gerta daitekeenari buruzko ziurgabetasun handia dute. Bestalde, artisauekin ere egin du berba Udalak.

Atzo iluntzean Unai Larreategi alkatea eta Jone Alberdi Nekazal zinegotzia, Debemeneko Agurtzane Etxaniz eta hainbat baserritar elkartu ziren osoko bilkuren aretoan, aurtengo Gaztañerre azoka antolatzeko bileran. Bertan, hainbat puntu landu zituzten.

Puntu garrantzitsuetako bat abelburuen partaidetzarekin lotutakoa izan zen. Izan ere, irailetik hedatzen ari den behien gaixotasun hemorragikoak erabateko ziurgabetasun egoera eragin du ganaduzaleen artean. 

Behien gaixotasuna

Batzarrean esplikatu zutenez, gaur gaurkoz, gaixotasun hori hedatzen duen eltxoari aurre egiteko duten bide bakarra da 9 egunetik behin behiei uxagarria botatzea. Baina hori egin arren ere, ezin dute jakin Gaztañerre egunerako zein egoeratan izango diren behiak eta haiek azokara jaisteko moduan izango diren. Soraluzeko zenbait ganaduzalek izan dituzte kasuak dagoeneko.

Udaleko eta Debemeneko ordezkariek esan zieten erabat ulergarria dela bizi duten ziurgabetasun hori, eta, aditzera eman zieten erakundeen aldetik prest daudela gaixotasunaren ondorioz, azokari begira sor daitezkeen alperreko gastuak bere gain hartzeko; hartara, ganaduzaleek Gaztañerren parte hartu ahal izateko pauso guztiak eman ditzakete (aseguruak egin, garraioa lotu…) eta gero, parte hartzeko ezintasuna suertatuko balitz, gastu horiek Udalak hartuko lituzke bere gain.   

Bi barazkigile

Horrez aparte, barazkigileen partaidetzari dagokionez, udal ordezkariek jakinarazi zuten haien partaidetza indartzeko ahaleginak egiten ibili direla baina ez dutela emaitza positiborik lortu. Kontsultatutako barazkigileen esanetan, ortuetan ez dute azokara ateratzeko beste produktu, bakarrik etxeko kontsumorako.

Hori horrela, iaz moduan, aurten ere, barazkigile bik parte hartuko dute azokan: Lezarrik eta Arizagak. Haiekin batera izango da beste postu bat Egotzako produktuekin eta aurten, Elgoibarko LIzagasar Sagartokiko produktuak ere izango dira azokan. Udal ordezkariek esplikatutakoaren arabera, Soraluzekoak izan ez arren, “bere produktuak hemen” saltzen dituztelako gonbidatu dituzte.

Barazkigileekin lotuta, berriz, esplikatu zuten aurten ez dela barazkigileen postuen arteko lehiaketarik egingo, bi bakarrik izanda, bien arteko lehia pizteak ez duelako “zentzurik”. Gaineratu zuten gaiari zelan buelta eman pentsatzeko zuzenean berba egingo zutela protagonistekin.

Taberna eta omenaldia

Osterantzean, bileran esan zuten baserritar nagusien omenaldiari bere horretan eutsiko zaiola,  aurten ere izango dela herriko sagardoa, saiheskia eta bestelako pintxoak salduko dituen taberna eta azokaren amaieran baserritarrek egin ohi duten bazkaria Gaztañerre azokaren ondorengo lehen astean egingo dutela.