Azken asteotan, Soraluzeko ume mordoa buru-belarri ari dira ziba edo peonza zeinek ondoen dantzan jarri. Izan ere, Iratxo Goxo-dendaren eskutik, aurten ere Soraluzera etorriko da Nazioarteko Ziba Txapeldun Jorge Morales, ziba lehiaketa egitera.
Sariak eta erakustaldia
Biharko, zapatua, egin du hitzordua, frontoian 17:00etan. Edozein umek zein gaztek parte hartu ahal du txapelketan. Gainera, ez dago aldez aurretik izena eman beharrik. Eta lehiaketako onenek saria izango dute, ziba bereziren bat, skateboard-en bat… Moralesek berak ekarriko dituenak.
Lehiaketa hasi aurretik, ohi duenez, ziba txapeldunak berak erakustaldia egingo du. Benetan iaioa da zibarekin eta saio ikusgarria egin izan du etorri izan den bestetan.