Orain arte SAPAko lehen pabiloiaren fatxadatik zihoazen azpiegiturak (argindarra, telefonia…) lurpetik bideratzeko lanak egiten dihardute tailer zaharraren barruan. Zanga bat zabaldu dute horretarako.
Gauza bera egingo dute datorren asteko martitzenean, maiatzaren 2an, baina lantegiaren kanpoko aldetik. SAPAko eraikinaren eta Baltegieta 26 artean zabaldu behar dute beste zanga bat eta arketa sartu gaur egun airetik doazen Iberdrolaren kableak lurperatzeko.
Gabolatseko zubia itxita
Udalak ohartarazi duenez, horrek eragina izango du inguruko zirkulazioan. Hain justu, maiatzaren 2an, 08:00etatik aurrera eta lanak bukatu arte, Gabolatseko zubitik ezingo da ibilgailurik pasa.
Zirkulazioa bideratzeko, arratsaldez ere erdigunea zabalduko dute eta Baltegietako garajeetarako sarbidea, berriz, Cañoneseko bide txikitik egingo da.