Aurreko urte batzuetan ere antolatu izan da urte amaieran bertso jaialdia, sarritan bertsolari gazteekin. Aurtengoan, bertsolari gazteekin batera beteranoagoek ere kantatuko dute baina beharbada aipagarriena da Eneko Beretxinagak plazentziatarrak eta Josune Aramendi Soraluzen bizi den markinarrak kantatuko dutela. Gainera, gai-jartzaile lanetan plazentzian bizi den Arrate Gisasola eibartarrak jardungo du eta protagonisten artean hiru herritar izateak, zalantzarik gabe, izaera berezia ematen dio jaialdiari.
Bertso ekimenak urte osoan
2022. urtean zehar Soraluzeko BertSora bertso eskolak bertsogintza sustatzeko hainbat ekimen antolatu ditu herrian, azkena, azaroan, Beñat eta Unai Gaztelumendik Bidea da borroka komiki liburua aurkezteko Gaztetxean egin zuten emanaldia. Ekimen hauek antolatzeko, eskolak Soraluzeko Udalaren babesa izan du.