Datozen asteotan, Bizikale merkatarien elkarteak hainbat ekimen ipiniko ditu martxan herritarren artean herriko komertzio txikien eskaintzak ezagutarazi eta bezeroak erakartzeko. Merkatarien elkartetik adierazi dutenez "oso garrantzitsua da herritarrek Gabonetan herriko komertzio txikietan kontsumitzea, urteko salmenten kopuru handi bat garaiotan egiten dutelako".
Argiak piztea, txokolatada eta zozketa
Barikuan, zazpi komertziok Gabonei begira bereziki prestatutako produktuak eskainiko dituzte Plaza Zaharrean jarriko duten Gabonetako azokan. 10:00etan zabalduko dute, 19:30ak arte. Parte hartuko dute Triskelek, Belarrak saltokiak, KLB6-k, Mendizabal okindegiak, Criadok, Lilurak eta Iratxo goxo-dendak.
Azokaren baitan, 18:00etan, Gabonetako argiak pizteko ekitalditxoa egingo dute, 18:30ean txokolatada eskainiko dute eta 19:00etan 30 euroko bost bonuren zozketa egingo dute azokan erosketak egin dituztenen artean. (Oharra: saria eskuratzeko bertan egon beharra dago).
Argiak denbora gutxiagoz piztu
Gabonetako argiei dagokienez, egunotan ekarriko dituzte, azken urteotan baino beranduago. Halaber, piztuta ere, bestetan baino ordu gutxiagoz egongo dira piztuta, aurten ordutegi murriztua izango baitute: 18:00etatik 22:00etara astegunetan, eta, asteburuan, berriz, 18:00etatik 02:00ak arte (ostalarien ordutegia aintzat hartuta). Horrela egitea erabaki dute, ez bakarrik energia garesti dagoelako, baita ingurumena zaintzearren ere, herriko Karakate Bizirik plataformak egindako eskaerarekin bat eginez.
Bestalde, umeei begira, Wipe-Out atrakzioa ekarriko dute, abenduaren 23tik urtarrilaren 6ra arte. Sarrerak Bizikaleko saltokietan erosi ahal izango dira, iazko prezio berberean: buelta bat euro bat. Gainera, sarrerak zenbakidunak izango dira eta haien artean dendetan gastatzeko bonuen zozketa egingo dute, beraz, behin sarrerak erabilita, ondo gorde.