Gaztelupeko Gaizka Azkaratek proposatuta animatu zen Juan Fernandez bere lehen argazki erakusketa egitera, Gaztelupen. Tabernaren nortasuna kontuan hartuta, musikarekin lotutako argazkiekin osatutakoa behar zuen izan eta hori oinarri, Fernandezek azken urteotan zuzenekoetan eta bestela atera dituen argazkien artean egin du aukeraketa erakusketa osatzeko.
Musikaren beste "perspektiba" bat
Barikuaz geroztik, 15 argazki ikusgai dira Gaztelupe tabernako bi solairuetan banatuta. “Emaitzarekin gustura geratu naiz eta Gaztelupekoak ere bai. Ilusioarekin nago. Azken batean, neuk ere musikarekin esperientzia handia izan dut azken urteotan; orain beste perspektiba batetik begiratu diot musikari eta emaitza argazki horiek dira”, esplikatu du egileak.
"Intentsitatearen istant" hori
Intentsitatearen isiluneak izenburua jarri dio erakusketari. Izan ere, Juan Fernandezentzat, musikaren zuzenekoak beti dira oso intentsuak eta horrekin metafora egin nahi izan du, gaineratuta, musikan isiluneek ere berezkoa duten garrantzia. Biak batuta, Fernandezek, argazki-kamerarekin klik egiten duenean, isilunea sortzen da argazkilariaren buruan, “intentsitate horren istant bat, isilune bat”.
