Gabolatseko zubia itxita

Datorren asteko eguaztenean eta eguenean, ibilgailuendako itxita izango da Gabolats kaleko zubia, egun osoan. Zubi berria eraikitzeko proiektuaren baitan, zundaketak egin behar dituzte zubiaren zutoinetan, ibaian. Oinezkoendako, berriz, zabalik izango da joan-etorria.

Datorren eguaztenetan eta eguenean, Gabolatseko zubipean, ibaian, zundaketak egin behar dituzte URA Agentziako adituek, han, geologikoki ze oinarri dagoen ikusteko. 

Hori egiteko makina berezia ekarriko dute eta bi egunez ibiliko da lanean. Hori egin ahal izateko, eguaztenean eta eguenean, zubia itxita izango da ibilgailuendako, ez, ordea, oinezkoendako. 

Zubia ordezkatu

2022ko otsailean Soraluzeko Udalak jakinarazi zuenez, Uraren Euskal Agentziak (URA) Gabolatseko zubia ordezkatzeko proiektua idazteko konpromisoa hartu zuen. Zubi hura gaur egunean eraikita dagoen modura presa efektua egiten duela azaldu zuten, ibaiaren ibilgua baldintzatuz.

Zubia ordezkatu behar dela aprobetxatuz, berria oraingoa baino zabalagoa egin nahi du Udalak, ibilgailuendako zein oinezkoendako lekua egokituz.