Astelehenean hiru etxe botatzeko lanak hasiko dituzte

Bota behar dituzten etxeak, ibai aldetik begiratuta.

Astelehenean, abuztuaren 1ean herriko hiru eraikin botatzen hasiko dira: Santa Ana 2koa (zubian dagoena) eta Santa Ana kaleko 6-8ko eraikinak. Azken eraisketa horren eraginez, besteak beste, Santa Anako edukiontziak Zubi Nagusira lekualdatuko dira, Gaztetxe ondoko aparkalekura, bihar, barikua.

Santa Ana 6-8ko eraikinak bota ahal izateko, aldamioa ipini behar dute fatxadetan. Horren eraginez Manikomunitatearen gaikako kamioiak ezingo dira bertatik pasatu eta horregatik aldatu behar dira Santa Ana kaleko beiraren, plastikoaren eta paperaren eta kartoiaren edukiontziak zubira. Behin lekualdatuta, eraiste obrak bukatu arte egongo dira Zubi Nagusian (argazkiko kokagunean).

Santa Ana 2

Santa Ana 2ko eraikinari dagokionez, berriz, kasu horretan, Udalak bota behar du berau. Obrak Zanjadores y Desmontes S.A enpresak lanok 47.662,28 euroan esleitu zituzten. Behin bota eta gero, espazio libre bat sortuko da Deba ibaiaren ertzean, hark utzitako orubean.