72 positibo

Beheranzko joerari eusten segitzen diete COVID-19 koronabirusarekin lotutako datuek. Gaurkoen arabera, Soraluzen, 72 positibo daude eta eskualde osoan, berriz, 1.298. Dena den, baliteke datuen irakurketa berriro ere aldatzea, izan ere, Espainiako Gobernuak Estatuko erkidegoei gogorarazi die test autodiagnostikoen positibo guztiak jakinaraztera derrigorturik daudela eta Osakidetzak ez du hori bete azken datuen jakinarazpenetan.

Atzo, eguaztena, Carolina Darias Espainiako Osasun ministroak erkidegoei gogorarazi zien derrigortuta daudela COVID-19a detektatzeko test autodiagnostikoetako positibo guztiak jakinaraztera. Izan ere, pazienteen historia klinikoan jasota geratu behar da COVID-19a pasatu dutela, horrela izan bada. Halaxe jakinarazi zuten komunikabideek atzo.

Gaur gaurkoz, derrigortasun hori ez du betetzen Euskal Autonomia Erkidegoak, bakarrik kontabilizatzen baititu lanerako gaixo-agiria behar duten eta sintomak dituzten positiboak. 

Beraz, ikuskizun dago datorren astetik aurrera zelan kontabilizatzen dituzten positiboak eta horren arabera, ikuskizun dago, baita ere, azken egunotan datuetan atzemandako beherakada benetakoa den ala ez.

Gaurko datuak

Edozelan ere, bien bitartean, gaur ere eguneratu dituzte datuak eta haien arabera, behera egiten segitzen dute positibo kopuruek zein intzidentzia-tasa metatuak. Joera bera ikusten da herrian zein eskualdean. 

Hona hemen datuak, herriz herri:

  • Eibar   600    6529,81
  • Elgoibar   284    6767,76  
  • Mendaro  47    5957,45
  • Deba   155   6565,19
  • Mutriku  140    6868,65
  • Soraluze  72    5435,33
  • Debabarrena 1298