Borrokaren balioa nabarmendu dute

Gaur, astelehena, pentsio publiko duinen aldeko elkarretaratzean, lau urteotan egindako mobilizazioen balantzea egin dute. Oro har, protestei esker izandako lorpenak azpimarratu dituzte eta horrekin batera, joan den zapatuko manifestazioak oso modu positiboan baloratu dituzte. Besteak beste, jakinarazi dute, guztira, 15.000 lagunen parte-hartzea lortu zutela. Halaber, gogora ekarri dute urtarrilaren 23an kalitatezko osasun zerbitzu publikoaren alde deituta dauden mobilizazioetan ere izango direla.

Gaur, 45 bat lagun elkartu dira Plaza Berrian pentsio publiko duinen aldeko elkarretaratzean. 2015ean hasi ziren mobilizatzen eta lau urteotako borrokari esker eskuratutako lorpenak nabarmendu dituzte: "Aldarrikapen batzuk bermatu dira. Borrokatu dugu, hainbat argudioei aurka egin diegu, proposamenak egin ditugu. Pentsioen erreformaren 1. zatian (2021eko abenduaren 2an) sartutako zuzenketetan, badira partzialki positiboak diren elementuak, besteak beste: alarguntza-pentsioan izatezko bikoteak aintzat hartzea. Ezinduen pentsioa eskuratzeko aukerak hobetzea. Pentsioen gastu debideratuei buruzko auditoria egiteko konpromisoa hartu behar izan du Estatuko Gobernuak. Banaketa bidezko Pentsioen Sistema Publikoa jasangarria dela eta bidezkoena eta sozialena dela frogatu dugu".

Horrekin batera, nabarmendu dute indartsu segitzen dutela: “Lau urteren ondoren, eta Covid-19aren 6 olaturen ondoren, Euskal Herriko Pentsiodunen Mugimenduak (EHPM) bizirik eta indartsu jarraitzen du, urtarrilaren 15ean, larunbatean, frogatu genuen bezala”.

Urtarrilaren 23an protestara

Ildo horretan, jakinarazi dute zapatuko manifestazioetan15.000 lagunek parte hartu zutela: 10.500 Bilbon, 900 Gasteizen, 950 Iruñean, 1.500 Donostian, 800 Eibarren eta gainerakoak Ondarroan, Tafallan, Lizarran eta Altsasun.

Eta jakinarazi dute Osakidetzako sindikatuek deitutako urtarrilaren 23ko manifestazioetan ere izango direla, Bilbon, Donostian zein Gasteizen.