Eli Lakuestaren argazki bat Ipuruan ipiniko dute

Ipuruan ipiniko dituzte argazki erraldoiak. Argazkia: Etakitto.

Eibarko Udalak koloreztatutako 10 argazki erraldoi ipini behar ditu Ipurua inguruan, urtarrilaren 19an.  Auzoarekin zerikusia duten argazkiak dira. Tartean, Eli Lakuesta soraluzetarraren argazki bat ipiniko dute, txirrindularitzakoa, KAS taldearena

1965eko Eibarko Bizikleta irabazi zuen KAS taldeko kideak azaltzen dira Ipuruan ipiniko duten Eli Lakuestaren argazki erraldoian: Elortza irabazlea, Anton Barrutia, Gabika, Langarika, Jimenez… Kontrargi Argazki Kolektiboak utzi die argazkia.

Bestelakoak

Beste argazkietako batean 1950eko apirilaren 23an Eibarren jokatu zen lehen errugbi partidua ikusi ahal izango da. Anglet Olympique eta Aviron Bayonnais izan ziren lehian. Eguraldiak ez zuen lagundu, baina jende-andana batu zen ordurarte Eibarren inoiz sekula ikusi bariko kirol hura ikustera.

Beste batean, berriz, Ipuruako dorreak eraiki aurretik zegoen paisaia ikusi daiteke. Plazaolaren argazkiak zuhaitz azpiko pasealeku luze elurtua dakargu gogora.

Argazki batzuetan jendea da protagonista. Auzoko jendea San Kristobal jaietan Lambrettak eskaintzen zituen hamaiketakoetan; umeak Ipurua zelaian disfrutatzen…

Kirol arloari helduz, Lakuestaren txirrindularitzako argazkiaz aparte, Ipuruako foball-zelaian jokatzen hasi zen Jose Eulogio Garate izango dugu protagonista. “Zuloaga en arte y en fútbol Gárate” pegatina ezagunaren futbolaria da bera eta 1964an SD Eibarrek Unión Deportiva Cultural Chantrearen kontra 3. mailan jokatutako partidaren golegileetako bat. Nazioarteko futbol-jokalari izatera iritsi zen Garate.

Festarako aukera ere badago argazkietan. Sanjuanetako koadrillen lehiaketak entzutetsuak izaten ziren 60ko hamarkadan: zezen plazara joatea eta argazkia ateratzea ezinbestekoa zen. Argazkietan hiru kuadrilla dauzkagu: Baikorak, Alaiak eta Peña Piquio.

Eta, azkenik zezen plaza bera erdian dela, eremu zabal bat, goitik hartuta: Txaltxa Zelaiko frontoi zaharra eta Arma Probalekua; Txaltxa baserria; Abelux bizikleta-tailerra; Astelena pilotalekuaren teilatua eta ortuak; Mari Tere Munduate andereñoak zuzentzen zuen Eibarko lehenengo ikastolaren lokalak; Capitol zinema, eta abar.