Lurgaiak lursailean bertako zuhaitz motak landatu eta zaintzeko ardura hartzen du eta lurjabeak, berriz, hitzarmenak zehaztutako epean aktibitate lukratiborik edota mozketa handirik ez egiteko konpromisoa, nahiz eta aukera duen etxerako egurra ateratzeko edota bertan animaliak izateko. Horrez gain, hitzarmena bertan behera laga nahi izanez gero, aukera hori ere aurreikusita dago.
Etxazpi izeneko lursaila pinudi izandakoa da, eta gaur egun, sasiarekin batera, haritz, lizar, gaztaina eta bestelako landareak datoz. Lurgaiak eta Baso Biziakek landaketak egiteko asmoa dute, umeekin batera.
Adostasunez
Baldintzak onuragarriak direla iritzita hartu zuten Arantzak eta Jose Ramonek erabakia: "Oso terreno aldapatsuak dira, nahiz garai batean lantzen genituen garia ereiteko... Guk hor egin beharrekoak eginda ditugu. Horregatik berba egin genuen Maiterekin eta Anerekin, eurak direlako etorkizunean lur horien jabe izango direnak eta elkarrekin erabaki dugu pinua edo eukaliptoa sartu beharrean, bertako zuhaitz klaseak sartzea. Udaletxearekin tratua sinatzear ginela Udalak atzera egin zuen eta iaz, Baso Biziakeko kideak etorri zitzaizkigunean, baietza ematea erabaki genuen". Maite eta Ane ere gustura daude: "Lursaila ardura da eta orain lasaiago gaude guk nahi moduan zaintzeko laguntza izango dugula jakinda".