Goizean, udal langileak, udaltzaingoa zein alkatea Irure auzora bertaratu dira, egoera bertatik bertara ikustera. Izan ere, han gainezka egin du urak eta zelaitik behera etorri da, auzoko errepideraino. Osterantzean, besteak beste, Eitzagan luizia gertatu da; zelai pusketa bat jausi da errepidera, baina txikia izan da luizia eta ez dio errepideari eragiten.
Deba ibaiari dagokionez, berriz, ikusgarri dator, indartsu, ur emari handiarekin eta ubidearen bazterrak, normalean bistan daudenak, urpean ageri dira gaur. Euskalmeten arabera, atzo, adibidez, San Prudentzioko estazio meteorologikoan neurtu zutenez, 44,5 l/m2 egin zituen. Edozelan ere, adituen arabera, moteltzera egingo du euriak, batik bat, gaur arratsaldean.
