Musikari berezia da Trigger, lehenik eta behin txeloarekin antzokietatik kanpo emanaldiak eskaintzen dituelako eta bestetik, bere txeloa jotzeko modua ezohikoa delako. Izan ere, Triggerrek ikasketa klasikoak eta rocketik eratorritako doinuen interpretazioak uztartzen ditu, munduko hainbat lurraldetako txelistengandik jaso dituen hainbat teknikarekin batera.
Emaitza 19 abestiz osatutako Poliedro Vol. I diskoa da, "forma eta kolore anitzekoa". Bertan aurki daitezke metala, post-rocka edo drum bassa besteak beste; bakarka, kamara formatuan, zein loop eta efektu pedalekin.
Aldi berean, proiektu pedagogikoa ere bada Zubizarretarena, izan ere, erabaki zuen obra guztien partiturak eta hauek interpretatu ahal izateko jarraibide metodologikoak liburu formatuan argitaratzea, "bidean ikasitakoak komunitatearekin elkarbanatzea oinarrizko premisa" hartuta.