Domekan, 08:30etik aurrera, herrian gora eta behera ibili ziren Kontrargiren Argazki Rallyan parte hartu zuten 28 argazkilariak. Honako gaien araberako argazkiak ateratzea zuten helburu: aztarnak, txoko xarmagarria, patxada, Mendiolako industrialdea eta bezeroak.
Argazkilariek nahi edo ahal beste argazki atera ondoren, haiek Kontrargiren ordenagailuan deskargatu zituzten, 14:00etarako. Ondoren, azaroaren 28rako bidali beharko dituzte norberak aukeratutakoak, posta elektronikoz kontrargi@hotmail.es helbidera eta epaimahaiak abenduaren 11n, 17:00etan jakiaraziko du erabakia.
Bost sari banatuko dituzte:
- 120 euro lehen multzorik onenarendako
- 90 euro bigarren multzorik onenarendako
- 70 euro hirugarren multzorik onenarendako
- 70 euro herriko onenarendako
- 50 eurotako bonua eta saria gazte onenarendako (16 urtera arte)
Sari banaketa, berriz, Gabon inguruan egingo dute.
Hamaiketako onenaren saria
Bestalde, Kontrargitik kontatu dute domekan une "polita" bizi izan zutela: "Momentu oso polita bizi zen eguerdi aldera: 2019.ean KONTRARGIk irabazi zuen Herriz Herriko Rallyen hamaiketako onenaren saria baina, COVID-19a zela eta, iaz ezin izan zuten jaso, eta aurten eman zioten. Txoko tabernako Txarok, Luckyk eta Maitanek ere bertaratutakoen txalo beroak jaso zituzten, "irabazitako merituengatik"", kontatu dute Kontrargitik.