Jakitzeko modukua

Pelikuletan moduan

Autoa lazoarekin eta haren ondoan, Oihana Hernandez eta Txisko Asensio.

Pelikuletan moduan,  lazo gorri erraldoi batez inguratutako BMW bat azaldu zen Zubi Nagusian atzo iluntzean, eguena. Zalaparta handia eragin zuen ikuskizunak eta noski, halakoetan onena galdetzea izaten denez, horixe berori egin genuen.

Barre artean erantzun zuten protagonistek, Txisko Asensiok eta Oihana Hernandezek. 

Hernandezek gidabaimena ateratzeko froga gainditu zuen eguaztenean eta Asensio mutil-lagunari bururatu zitzaion notizia ona ospatzeko oparirik onena kotxea oparitzea zela. 

Baina ez edozein modutara. Atxurin autoa lazo gorriz jantzi -lagun baten laguntzarekin (argazkian) eta nahikoa lanekin, lekukoek kontatutakoaren arabera- zubira ekarri eta sinistu ezinda zegoen Hernandezi oparitu zion. 

Hark, lotsa gainditu ostean, barrezka eta muxuka eman zion eskerrona Asensiori.