Guztira, 90,23 metro koadro hartuko ditu Txurrukenen egokituko duten kalistenia parkeak. Kautxuzko zorua izango du eta haren bueltan, honako elementuak: horma-barrak, barra bertikala, uztaiak, eskalatzekoa, sigi-saga egitekoa, brakiatzailea, dantza-barra, kristo eta dominatuak, bi barra finko, moxal bikoitza eta abdominalak egiteko bankua.
17.406 euroko aurrekontuarekin, Agapito Urban Industries S.L. enpresak egingo ditu lanak. Oraingoz, lanak egiteko epea zehazteke dago, nahiz eta asmoa laster hastea den.
Jarlekuak berritu eta bat aldatu
Horrez aparte, Txurrukeneko parkean dauden jarlekuak garbitu, lixatu eta margotu egingo dituzte. Kasu honetan, Manu arotzak egingo ditu zaharberritze lanak, 1.633,50 euroan. Era berean, jarleku bat aldatu eta berria ipiniko dute eta hori kalistenia parkea eraikiko duen enpresa berberak egingo du.
Kalistenia gazteen artean geroago eta arrakasta handiago duen kirol jarduera da. Aire librean egiten da eta norbere gorputzaren pisua oinarri duten ariketak egiten dira. Street Workout edo parkour mugimenduak erabiltzen dira kalistenian eta muskuluak zein sistema kardiobaskularra garatzen dira.