Bertso jarrien eta abesbatzaren kantuen artean abiatu zen zapatuan erreferendumaren aldeko giza-katea. Hirurogeiren bat herritarrek parte hartu zuten bertan eta antolatzaileek banatutako ohialei helduta, Kiroldegiko pasealekutik eta Gabolatsetik buelta egin zuten ibilbidea berriz Zubi Nagusira heldu arte.
Monika Muro eta Xabier Alberdi Soraluzeko Gure Dagoko kideek irakurri zuten eguneko mezu nagusia: “Ez gaude inoren zain! Herritarron garaia da, ez elote politikoak zer egingo zain egoteko unea. Eragile eta herritarrok badugu gaitasuna herri erronkei aurre egiteko beharrezko adostasunak josteko. Zubigile izateko bokazioa dugu, baina gure asmoak betetzeko, gurekin bat egiteko prest egongo den zubigile asko beharko dugu”.
Herritarrei hiru “erronka” proposatu zizkieten: “www.hamaikagara.eus webgunean sartu eta erreferendumaren aldeko manifestua sinatzea, eta horrekin batera, kanpainaren eskumuturrekoa eskuratu eta janztea; 11 sinaduren erronkari eutsi, eta inguruko 11 lagunek, gutxienez, manifestua sinatu eta erronkarekin bat egin dezaten saiatzea; eta azkenik, eraikitzen ari garen oinarri sendo hori ikusarazteko, uztailaren 3an, Bilboko Areatzan egingo dugun mobilizaziora joatea”.