2020tik dihardu lanean Soraluzeko Baso Biziak elkarteak, urte amaiera ingurutik. Azaroan sortu zuten elkartea bera, bazkidetza kanpaina abiarazi, 100 bazkide pasa lortu eta besteak beste, Soraluzen, bertako zuhaitzak landatzeko bi jardunaldi antolatu dituzte 2021eko lehen hilabeteetan.
Orain, elkartea publikoki aurkeztuko diete herritarrei. Besteak beste, horretarako antolatu dute ekainaren 3ko jardunaldia. Herri Antzokian da hitzordua. 18:30ean hasiko da eta Baso Biziak elkartea aurkeztearekin batera, Lurgaia Fundazioa ere aurkeztuko dute, bi elkarteak elkarlanean jardun eta jardungo baitute “bertako baso bizien alde”.
Jardunaldia borobiltzeko, Euskal Herriko Unibertsitateko Ekologia katedradun Arturo Elosegik eukaliptoen gaineko hitzaldia eskainiko du, zehazki, zuhaitz mota horrek ingurumenean duen eraginaren berri emango du.